XEDATZEN DUT

1.1.Foru dekretu honen helburua Gipuzkoako Foru Aldundiko Giza Eskubideetarako, Enplegurako eta Gizarteratzeko Departamentuaren enplegu programak arautzeko oinarriak onartzea da.

1.2.Europako estrategiaren ardatzak erreferentzia gisa hartuz, aurrera eraman behar diren lan ildoak ondoko hauek dira:

—Lan munduan eta lanbidean sartzea: Gaitasun profesionala eman eta lanbidean sartzea lortu nahi duen programa. Horretarako, lan informazio eta orientazioko bitarteko pertsonalizatuak daude, emakumeen eta lehen lanaren bila dabiltzan gazteen eta iraupen luzeko langabezian dauden 40 urte baino gehiagokoen lan prestakuntza eta praktikak.

—Ikasteko gogoa garatzea: Enpresa proiektuak (ekimen handiko gazte eta emakumeenak) aurrera ateratzen lagundu bahi duen programa, landa eremuan eta tele-prestakuntzan.

—Lan merkatu integratzailea neurri berritzaileekin bultzatzea, talderik behartsuenak gizartetik baztertuta egoteko arriskuaren kontra borrokatzeko.

2.1.Enplegu programako diru laguntzak urtero emango dira deialdi irekiaren bidez eta bertan finkatuko da programarako baimendutako gastua.

2.2.Oinarri arautzaile hauetako I. eranskinean zehazten da 2004 ekitaldiko deialdi irekia.

3.1.Foru dekretu honetan ezarritako laguntzen onuradun izan daitezke langabezian eta ondoko kolektiboetakoren batean sartuta dauden pertsonak:

a)Lehen lanaren bila dabiltzan gazteak.

b)Emakumeak.

c)Iraupen luzeko langabezian dauden 40 urtez gorako pertsonak.

d)Ezintasunen bat duten pertsonak.

e)Gizartetik baztertuta geratzeko arrisku agerian dauden pertsonak.

3.2.Foru dekretu hau kudeatzeko, dekretuko dirulaguntzak jasotzeko entitate onuradun gisa hartuko dira:

a)Batxilergoa eta heziketa zikloak ematen dituzten Bigarren Irakaskuntzako ikastetxeak, Eusko Jaurlaritzako Hezkuntza, Unibertsitate eta Ikerketa Sailak emandako herri funtsekin finantzatuta daudenak.

b)Prestakuntza zentroen elkarteak edo taldeak eta/edo eskola erkidegoak, goiko paragrafoan aipatutako erakundeen interesak ordezkatzen dituztenak.

c)Enpresa eta/edo enpresaburuen elkarteak eta lan munduan sartze arloan esperientzia egiaztatua duten beste gizarte elkarteak.

3.3.Gipuzkoan kokatuta egon behar dute 3.2 artikuluak aipatzen dituen entitateak eta, era berean, zerga betebeharrak eta Gizarte Segurantzakoak betetzen dituztela justifikatu behar dute kasuan kasuko dirulaguntzak ordaindu aurretik; horretarako, eskaera aurkezteak esan nahi du berariazko baimena eman behar dela Giza Eskubideetarako, Enplegurako eta Gizarteratzeko Departamentuak, hala izanez gero, egiaztapen egokiak egiteko.

4.1.Foru dekretu honetan aurreikusitako enplegu programak Giza Eskubideetarako, Enplegurako eta Gizarteratzeko Departamentuko «Gizarteratze eta Enplegu» aurrekontu programatik hartutako funtsen bidez finantzatuko dira.

4.2.Baldin eta dekretu honetan aurreikusitako jarduketak eGIPUZKOA 2005 programaren eta Gipuzkoako Foru Aldundiak finantzaketa gehigarria jasoko lukeen erakundeen arteko jarduketaren batean sartuko balira, finantzaketa hori dagokien aurrekontu sailetara bideratuko litzateke.

Emango diren laguntzek ondoren aipatzen diren proiektuak osorik edo zati batean finantzatzeko helburua izango dute:

a)Emakumeak, iraupen luzeko langabezian dauden pertsonak, lehen lanaren bila dabiltzan gazteak eta talde behartsuak lan munduan sartzeko programak eta laguntza neurriak, bai prestakuntza eta lanbide gaitasun osoko ekintzen bidez, bai lan esperientzia sustatzen duten ekintzen bidez.

b)Gazteak eta emakumeak lehen sektoreko lanetarako prestatzeko programak, prestakuntza espezifiko baten bidez enpresak sortzeko gaitasun handiko pertsonak kontzientziatu, sentsibilizatu eta bultzatuz.

c)«Ikasketa kontu birtuala» esperimentatzeko ekintzak, prestakuntza eta gizarteratzea sustatzeko bide gisa.

6.1.Proiektuak hautatzeko, irizpide orokor hauek erabiliko dira:

1.Entitate sustatzailearen esperientzia eta prestigioa. 50 puntu gehienez.

2.Ekintzen izaera berritzailea. 50 puntu gehienez.

3.Proposatutako helburuen eta garatu beharreko metodologia eta bitartekoen arteko koherentzia eta neurri egokia. 50 puntu gehienez.

4.Onuradunen kopurua. 50 puntu gehienez.

5.Aurkeztutako jarduketaren garapenak finantza bideragarritasuna edukitzea. 50 puntu gehienez.

6.Emakumeen eta gizonen arteko aukera berdintasuna bultzatzearen aldeko ekintzak sartzea. 50 puntu gehienez.

6.2.Proiektuak hautatzeko, berariazko irizpide hauek erabiliko dira, proiektu bakoitzaren arabera:

5.a artikuluan aurreikusitako ekintzetan:

1.Onuradunaren langabezia denbora. 50 puntu gehienez.

2.Onuradunak lan munduan sartzeko dituen zailtasunak. 50 puntu gehienez.

3.Onuradunak lan munduan sartzeko duen jarrera aktiboa. 50 puntu gehienez.

4.Gizonen eta emakumeen arteko aukera berdintasun arloan, diskriminazio positiboa egitea. 50 puntu gehienez.

5.Programazioaren kofinantzazio maila. 50 puntu gehienez.

5.b artikuluan aurreikusitako ekintzetan:

1.Kofinantzazio maila. 50 puntu gehienez.

2.Ahalik eta gizarte agente gehien bilduko duen dinamika bateratua edukitzea. 50 puntu gehienez.

3.Onuradunak lan bizitzari begira gertu egotea. 50 puntu gehienez.

7.1.Ahal den neurrian Internet bidez aurkeztu behar dira agiriak, Giza Eskubideetarako, Enplegurako eta Gizarteratzeko Departamentuak duen informatikako programako web orriaren bitartez (www.gipuzkoa.net/egokilan). Era berean, foru dekretu honetako 3.2. artikuluan aipatutako laguntzak eskatzen dituzten entitateek Europako Erkidegoko agintariek eskatutako informazioa aldez aurretik erabakiko den formatuan eman behar dute.

7.2.Aurreko paragrafoan ezarritakoa horrela bada ere, azaroaren 26ko 30/1992 Legeak, Herri Administrazioen Zuzenbide Arauen eta Administrazio Jardunbide Erkidearenak, 38.4 artikuluan aurreikusitako moduren batean ere aurkez daitezke eskaerak.

7.3.Aurkeztutako proiektuei buruzko ebaluazioa eta ebazpena ondo egiteko behar duen hainbat argibide eskatu ahal izango die Giza Eskubideetarako, Enplegurako eta Gizarteratzeko Departamentuak eskatzaileei. Argibide horiek ez badira aurkezten 10 lanegunen barruan, ezetsitzat joko da eskaera, azaroaren 26ko 30/1992 Legeak, Herri Administrazio Guztien Zuzenbide Arauen eta Administrazio Jardunbidearenak, 42.1 artikuluan aurreikusitako eran ebazpena eman ondoren.

Diruz lagundutako proiektuak urteroko deialdian adierazitako epean justifikatu behar dira, eta handik aurrera, emandako diru laguntzaren aurrekontu izendapena kontabilitatetik kendu ahal izango da.

Diru laguntzak emateko norgehiagokako lehiaketa izango da sistema. Horretarako, batzorde bat eratuko da, Giza Eskubideetarako, Enplegurako eta Gizarteratzeko Departamentuko diputatuak berariaz izendatutako lehendakaria, idazkaria eta bi kide izango dituena eta batzorde hark aztertuko ditu aurkeztutako eskaerak. Batzordeari ondoko eginkizunak dagozkio:

a)Eskaerak 3. artikuluan onuradunen inguruan adierazitakoari egokitzen zaizkiola aztertzea.

b)Aurkezten diren proiektuak aztertzea eta baloratzea.

c)Proposamenak gora helaraztea.

d)Proiektuen segimendua egitea.

e)Dirulaguntzak ordaintzeko erari buruzko proposamena egitea.

10.1.Dekretu honen berariazko eremuan, diru laguntzak Giza Eskubideetarako, Enplegurako eta Gizarteratzeko diputatuaren foru aginduaren bidez eman edo, kasua bada, ukatuko dira, aurreko artikuluan adierazitako batzordeak proposatuta.

10.2.Herri Administrazio Guztien Zuzenbide Arauei eta Administrazio Jardunbideari buruzko azaroaren 26ko 30/1992 Legearen 42. artikuluan ezarritako ondorioetarako, prozeduraren ebazpena eman eta jakinarazteko epea, gehienez ere, sei hilabetekoa izango da, eskabideak aurkezteko epea amaitzen den egunetik kontatuta. Behin epe hori igaro denean, ez bada berariazko ebazpena eman eta jakinarazi, eskaera ezetsitzat hartu behar da administrazio isiltasunagatik, aipatutako Legearen 44.1 artikuluan xedatutakoarekin bat etorriz.

11.1.Oro har, diru laguntzen %50 proiektua hasten denean, behar bezala egiaztatu ondoren, eta Ogasun eta Gizarte Segurantzarekiko ordainketetan egunean egotearen ziurtagiri eguneratuak aurkeztean ordainduko da. Gainerakoa proiektuak bukatzean ordainduko da eta egiaztatzeko lanen deskargu tekniko eta ekonomikoa, ordainagiriak, egindako ordainketen banku zurigarriak, halakorik balego, eta zerga eta Gizarte Segurantzako betebeharretan egunean egotea egiaztatzen duten ziurtagiriak aurkeztuko dira.

11.2.Prestakuntza eta/edo praktika aldiak konbinatzen dituzten ekimen barruan, egiten direnean lan munduan sartzeko ekintzak, prestakuntzaren gastuen ordainketa, oro har, gastuak egiaztatu eta praktiken hitzarmena sinatzen denean egingo da. Praktiken kontzeptuari dagokion gastua, berriz, horiek amaitu ondoren egingo da.

11.3.Nahikoa arrazoi dagoen kasuetan diru laguntza osoa eman ahal izango da proiektu edo jarduketa gauzatu aurretik. Ordainketa aurreratua eskatuz gero, proiektuaren hasiera behar bezala egiaztatu behar da, eta Foru Aldundiaren iritziz nahikoa izango den banku abala aurkeztu, aurreratutako diru laguntzaren zenbatekoari eta aurrerakina ematen denetik proiektua bukatu bitarteko berandutze interesei dagokiena. Berandutze interesa Gipuzkoako Aurrekontuen Foru Arauetan aurreikusitakoa izango da.

11.4.Abala kitatzeko, laguntza hartutako proiektuaren amaiera egiaztatu behar da. Horretarako, behin betiko fakturak eta dagozkien ordainketak, proiektuaren kopia, eta zerga gaietako eta Gizarte Segurantzarekiko betebeharrak bete izana erakusten duten ziurtagiri berriak bidali behar dira Giza Eskubideetarako, Enplegurako eta Gizarteratzeko Departamentura.

12.1.Diru laguntzaren onuradunak behartuta daude eskatzen zaizkien dokumentuak esandako epean erakustera eta laguntza hartu duen jarduketa zuzen gauzatuko dela bermatzeko egiaztapenak egiteko erraztasunak ematera.

12.2.Giza Eskubideetarako, Enplegurako eta Gizarteratzeko Departamentuak ahalmena du emandako diru laguntzak behar bezala erabiltzen direla eta foru dekretu honetan ezarritako gainerako baldintzak ere betetzen direla egiaztatzeko egoki deritzon jarduketak egiteko.

12.3.Foru dekretu honetan eta gainerako araudi aplikagarrietan ezarritako edozein betebehar ez badu betetzen, onuradunak diru laguntza hartzeko eskubidea galdu duela deklaratuko da, eta hartutako dirua itzuli egin behar du, zuzenbide publikoko diru sarrera gisa. Gainera, legezko erantzukizunak eskatu ahal izango zaizkio.

12.4.Foru dekretu honetan aurreikusitako laguntzak bateragarriak izango dira beste laguntza batzuekin, baldin eta bien baturak ez badu lagundutako proiektuaren benetako kostua gainditzen. Onuradunek horren inguruko aitorpena egin behar dute eskaerarekin batera eta ordainketak egiten hasi aurretik; eta Gipuzkoako Foru Aldundiko Giza Eskubideetarako, Enplegurako eta Gizarteratzeko Departamentua gai horren inguruan jakinaren gainean edukitzeko konpromisoa hartuko dute. Halaber, proiektuaren kostuaren gainetik jasotako zenbatekoak itzuli egin behar dituzte, eta zuzenbide publikoko sarreratzat hartuko dira.

12.5.Diru laguntzak itzuli behar izanez gero, honako foru agindu hau hartuko da jarraibidetzat: Ogasun eta Finantzetako foru diputatuaren 1994ko maiatzaren l9ko 327/1994 Foru Agindua, subentzioak eta laguntzak emateko prozedurari aplikagarri zaion erregimen orokorra arautzeari buruzko 1993ko apirilaren 6ko 27/1993 Foru Dekretua garatzen duena.

Giza Eskubideetarako, Enplegurako eta Gizarteratzeko Departamentuak, ebaluaketa kudeaketa bitartekotzat jotzen den neurrian (eraginkortasuna eta eragingarritasuna hobetzea), ebaluaketako sistema orokorrak ezarriko ditu garatutako jarduketak eta lortutako emaitzak neurtu ahal izateko.

14.1.Diru laguntza emango zaien proiektuak Europako Batasunak aurreikusitako helburu, arau eta egintzei egokitzen zaizkien neurrian, jarduketa horiek EBri aurkeztuko zaizkio, finantzaketan parte har dezan.

14.2.Ekintzak, Europako Erkidegoko arauetan azaldutako definizio eta jarraibideen arabera egin behar dira, eta zehazkiago Europar Batzordearen 2000ko uztailaren 28ko 185/2000 zk. Araudikoak, zeinaren bidez 1.260/1999 zk. Araudia aplikatzeko xedapenak ezartzen baitira, Egiturazko Fondoen bitartez finantzatutako eragiketen gastuak finantzatzeari dagokionez.

14.3.Foru dekretu honen onuradunek, elkarren artean finantzatutako jardueretan, berariaz adierazi beharko dute Gipuzkoako Foru Aldundiko Giza Eskubideetarako, Enplegurako eta Gizarteratzeko Departamentuaren eta Europar Batasunaren laguntza jaso izana.

2004ko martxoaren 8ko 21/04 Foru Dekretuak, Gipuzkoako Foru Aldundiaren jarduera esparruan hizkuntza ofizialen erabilera arautzen duenak, 8.2 artikuluan xedatutakoaren arabera, onuradunek diruz lagundutako beren jardunaren bitartez sortutako agerpen publiko orotan euskara erabili beharko dute.

Indargabetu egiten da 2003ko martxoaren 11ko 8/03 Foru Dekretua, Informazioaren eta Jakintzaren Gizartean Enplegua Sustatzeko Programa, bizi guztiko prestakuntza bitartekotzat hartzen duena, arautzeko oinarriak onartzen dituena, bai maila bereko edo beheragoko gainerako xedapenak ere foru dekretu honen aurka dauden zatietan.

Ahalmena ematen zaio Giza Eskubideetarako, Enplegurako eta Gizarteratzeko Departamentuko foru diputatuari Foru Dekretu hau ongi garatu eta aplikatzeko behar diren xedapenak eta egintzak emateko.

Foru Dekretu hau Gipuzkoako Aldizkari Ofizialean argitaratu eta hurrengo egunean sartuko da indarrean.

Donostia, 2004ko ekainaren 1a.

(5700) (5439)

I. ERANSKINA

Foru Dekretu honen bitartez emango diren diru laguntzak 1.0820.200.481.00.05 kontusailetik ordainduko dira. Kontusailaren hasierako kreditua 2.842.766,75 eurokoa da, eta kopuru hori handitu edo txikitu egin dezake aldaketaren zenbatekoaren arabera horretarako eskumena duen organoak.

Plan honetarako eskaerak aurkezteko epea 2004ko irailaren 30ean bukatuko da.

Foru Dekretu honek xedatutako laguntzak jasotzen dituzten proiektuek 2003ko urriaren 30etik aurrera hasita izan behar dute; edonola ere, proiektu horiek, zati batean edo osatasunean, 2004. urtean gauzatu beharko dira.

Proiektuak egiaztatzeko epea 2005eko azaroaren 30ean amaituko da.

Foru Dekretu honen 10.2 artikuluan ezarritakoaren kalterik gabe, 2004ko ekitaldirako prozeduraren ebazpena eman eta jakinarazteko epea gehienez ere hiru hilabetekoa izango da.

Diru laguntzen eta portzentaien zenbatekoak foru dekretu honetako 6. artikuluan adierazitako hautatzeko irizpideen eta Europako Batasunak 2003an enplegurako emandako eta Kontseiluak 2003ko uztailaren 22an hartutako jarraibideen arabera zehaztuko dira (197 L, 2003/08/05ekoa).